गुल्मीको धुर्कोटमा भेटियो नयाँ गुफा

काठमाडौं ।  गुल्मीको धुर्कोट गाउँपालिकामा नयाँ गुफा फेला परेको छ । ६ दिनअघि हाडहाडेको बर्दबासस्थित धाराखोलामा करिब एक सय मिटर लामो गुफा फेला परेको वडाध्यक्ष पदम विष्टले बताएका छन् ।

दुम्सीको दुलो भनेर चिनिएको उक्त ठाउँमा मान्छे छिर्न सक्ने प्वाल रहेको थियो । गुफाभित्र शिव लिङ्ग, गाईको थुन, मूर्ति, मानिसको आकार, रक्त धारा, सात मुखे नागका आकार, महिलाले बच्चा लिएर बसेको, नाग, खेतबारी जस्ता देखिने विभिन्न आकर्षक आकृति रहेको उनले जनाए ।

नयाँ गुफा फेला परेको जनाकारी पाएपछि अहिले दैनिक सयौँ मानिस गुफा अवलोकन गर्न पुग्ने गरेका छन् । पाँच दिनको अवधिमा छ सयभन्दा बढी व्यक्तिले गुफा अवलोकन गरिसकेको वडाध्यक्ष विष्टले जनाए ।

वि.सं २०२८ मा बहुदलीय र निर्दलीयबिचको लडाइँ हुँदा सोही ठाउँमा गई लुकेको स्थानीयवासीले बताए । वि.सं २०६२ मा तुलाराम पाण्डेलगायत स्थानीयवासी सो ठाउँमा ढुङ्गा झिकेर भित्र पस्ने प्रयास गर्दा प्वालभित्र रहने जङ्गली जनावरको आक्रमणको भयले भित्र जान सकेका थिएनन् ।

मान्छे लुक्न मिल्ने प्वाल भेटिए पनि उक्त स्थानलाई साराको दुलोको नामले चिनिँदै आइएको थियो । छलफलकै क्रममा उक्त ठाउँमा प्वाल भएको जानकारीपछि वडाध्यक्ष विष्टकै पहलमा स्थानीय तुलाराम पाण्डेको नेतृत्वमा प्वाल भित्र जाँदा गुफा रहेको पत्ता लागेको हो । उक्त गुफाको चौडाइ र उचाइ पाँचदेखि आठ फुटसम्म रहेको जनाइएको छ ।

फेला परेको नयाँ गुफालाई ‘धनिश्वर मनोरम नागेश्वर गुफा’ नामकरण गरिएको छ । गुफा संरक्षणका लागि रामप्रसाद कुँवरको अध्यक्षतामा १३ सदस्यीय संरक्षण समिति, प्रेम नेपालीको संयोजकत्वमा प्रचारप्रसार समिति र जुद्धबहादुर खत्रीको संयोजकत्वमा सल्लाहकार समिति गठन गरिएको छ । हाडहाडेमा भेटिएको नयाँ गुफासँगै धुर्कोट गाउँपालिकामा विचित्र गुफासहित गुफाको सङ्ख्या दुई पुगेको छ ।