जित सुनिश्चित भएपछि बालेनले भने- ‘हामी विजय जुलुस मनाउँदैनौँ’ 

काठमाडौं । काठमाडौं महानगरपालिकाको मेयरमा आफू निर्वाचित हुने निश्चित भएपछि स्वतन्त्र उम्मेदवारी दिएका बालेन्द्र शाहले विजय जुलुस नमनाउने बताएका छन् । सामाजिक सञ्जालमा लेख्दै उनले आफूले जम्मा ३५ प्रतिशत मत प्राप्त गर्ने र बाँकी मतदाताको अपमान हुने गरी विजय जुलुस मनाउन नहुने बताएका छन् ।

‘यसै पनि चुनावमा जित्नेले धेरै मत ल्याउने हो, बहुमत होइन । मेरो स्वयमको पनि बढीमा ३५ प्रतिशत मत आउला । यसको अर्थ हो, बदर मतहरू बाहेक बाँकी ५० प्रतिशत जति मतदाताहरूले अरूलाई छनौट गर्नु भएको छ । हामीलाई मत हाल्ने ३५ प्रतिशतको शिर उँचो पार्दै गर्दा बाँकी ५० प्रतिशतको शिर निहुराउनु पर्ने काम वा सङ्केत भएको छ कि भन्नेमा ध्यान दिनु पर्छ ।’ बालेनले लेखेका छन्- ‘अहिले यति भन्न सकिन्छ कि, हामी काठमाण्डौँ महानगरको जिम्मेवारी बोक्न योग्य छौँ भनेर महानगरका मतदाताहरूले हामीलाई विश्वास गर्नु भएको छ । यहाँ विश्वासको कुरा छ । विश्वासमा जीत वा हार हुँदैन । जीत-हारलाई मतगणना सकिएसँगै सकिदिऊँ । घोषणापत्रमा भएका कुराहरू लागू गर्न सकेका दिन सबै मिलेर विजय उत्सव मनाउँला । तर अहिले विजय जुलुस भनेर अरूलाई पराजित भन्ने सङ्केतसम्म पनि नगरौँ ।’

विजय उत्सव मनाउन विभिन्न ठाउँबाट काठमाडौंमा र्‍याली आउने तयार भइरहेको जानकारी आफूले पाएको जनाउँदै बालेनले काठमाडौंमा नआई आ-आफ्नै ठाउँमा विजय उत्सव मनाउन आह्वान समेत गरेका छन् ।

‘ठाउँ ठाउँबाट र्‍यालीका लागि काठमाण्डौँ आउने कुराहरू एकदमै धेरै सुनिरहेका छौँ । हाम्रो अनुरोध के हुन्छ भने तपाईँहरू कोही पनि र्‍यालीका लागि काठमाण्डौँ आउने दुख गर्नु पर्दैन । यो अभियान सबैको हो । यसको स्वामित्व हरेक नेपालीले जहाँबाट जसरी पनि लिइदिए हामी खुसी हुनेछौँ ।’ बालेनले भनेका छन्- ‘अभियानको अहिलेसम्मको सफलताका लागि खुसीयाली प्रकट गर्ने नै हो भने पनि तपाई रहेकै क्षेत्रमा धन्यवाद र्याली गर्नु होला । त्यसले सो स्थानमा बढी प्रभाव छोड्छ । नेपालमा बालेन मात्रैको यो अभियान होइन, यो नेपालभरको अभियान हो भन्ने सन्देश जान्छ । बालेनहरूका लागि देशभरका नागरिक साथसाथै रहन्छन् भन्ने देखिन्छ । यहाँ पनि यस्तो किसिमको चेतना र अभिमत रहेछ भनेर प्रोत्साहन हुनेछ  ।’

बालेनले आफ्नो वास्तविक परिक्षा अव सुरु हुने बताउँदै साथ सहयोग, सल्लाह सुझाव र खबरदारीको अपेक्षा राखेका छन् । ‘हाम्रो अभियानको वास्तविक परीक्षा अब सुरु हुनेछ । हामीलाई साथ र सुझाव जति महत्त्वपूर्ण छ, उति नै खाँचो पर्नेछ खबरदारीको । हामीले बाटो बिराउन लाग्यौँ भने खबरदारी गर्नुहोला । अनि हाम्रो अभियानको ऊर्जाको लागि हामी सधैँ तपाईँहरूसँग जोडिरहेका हुन्छौँ । तपाईँहरूको उपस्थिति र साथको आवश्यकता महसुस हुने बित्तिकै हामी आवाज दिनेछौँ । बालेनले भने ।’

उनले काठमाडौँको मुहार फेर्न सबै मिलेर अगाडि बढ्नुपर्नेमा जोड दिएका छन्  ।

हेर्नुहोस् बालेनको लेख जस्ताको तस्तै: